Tengivirki Varmahlíð

Byggð verða tvö ný tengivirki, annars vegar yfirbyggt 66 kílóvolta, fimm rofareita tengivirki í Varmahlíð og hins vegar yfirbyggt 66 kílóvolta, fjögurra rofareita tengivirki á Sauðárkróki. Tengivirkið í Varmahlíð verður reist á lóð núverandi 132 kílóvolta virkis.

Eina tenging Sauðárkróks við flutningskerfið er 66 kílóvolta loftlína frá Varmahlíð sem er orðin rúmlega fjörutíu ára gömul og mun tilkoma jarðstrengsins auka orkuöryggi og meira en tvöfalda flutningsgetu að svæðinu. Áformað er að jarðstrengurinn, sem verður um 24 kílómetra langur, liggi samsíða núverandi loftlínu hálfa leiðina að Sauðárkóki en við Sauðárkróksbraut nyrðri helming leiðarinnar. Þá verður núverandi loftlína, Sauðárkrókslína, tengd með jarðstreng við tengivirkið á Sauðárkróki.

Verkís sér um hönnun og gerð verklýsingar, magnskrár og útboðsgagna fyrir tengivirkið, það er fyrir 66 kílóvolta GIS rofabúnað, ásamt hjálparbúnaði, gerð verkteikninga, aðstoð á útboðstíma og verktíma. Í Varmahlíð á að gera undirstöður fyrir einn 132 kílóvolta AIS rofareit og undirstöðu fyrir einn 132 kílóvolta 30 MVA aflspenni. Verkís sér um aðstoð á útboðstíma, hönnunareftirlit og aðstoð á verktíma.