Rafvæðing Miðbakka: Skemmtiferðaskip tengt við rafmagn
![Rafvæðing Miðbakka](https://www.verkis.is/wp-content/uploads/2024/06/download-1.png)
Rafvæðing Miðbakka. Í vikunni var skemmtiferðaskip tengt við rafmagn á Miðbakka í Reykjavíkurhöfn, sem mun draga úr loft- og hávaðamengun í miðbænum. Verkís hafði yfirumsjón með hönnun, innkaupum á búnaði, eftirliti og prófunum.
Norska skemmtiferðaskipið Fridtjof Nansen var fyrsta skipið til að tengjast rafmagni í Reykjavíkurhöfn. Tenging tók aðeins tíu mínútur og sparar skipinu sjö til átta þúsund lítra af eldsneyti í 12 tíma landlegu. Yfirvélstjóri skipsins, Jan Robin Pettersen sagði í samtali við fréttamiðla: „Yfirleitt brennum við alla þá olíu og það kostar Reykjavík og jörðina útblástur. Nú spörum við okkur það.“
Halla Hrund Logadóttir, orkumálastjóri og fyrrum forsetaframbjóðandi, var viðstödd athöfnina og lagði áherslu á mikilvægi rafvæðingar hafna fyrir orkuskipti. Sigurður Jökull Ólafsson, markaðsstjóri Faxaflóahafna, sagði að þetta væri stórt skref fyrir umhverfismálin og bætt loftgæði í Reykjavík.
Verkís og Faxaflóahafnir unnu að landtengingunni í samstarfi við norsku skipaútgerðina Hurtigruten Expeditions. Faxaflóahafnir eru með fyrstu höfnunum í heiminum sem bjóða upp á þessa þjónustu, sem markar stórt skref í átt að hreinni framtíð.