Nýja Ölfusárbrúin komin á mikilvægan áfanga

Unnið er að því að fleyta nýju Ölfusárbrúnni yfir Ölfusá, en brúin er um 330 metra löng og vegur um 2.000 tonn. Þetta er mikilvægur áfangi í framkvæmdum við nýja Hringveginn, sem miða að því að bæta umferðaröryggi og greiða fyrir umferð um Selfoss.

Verkís kemur að verkefninu með hönnun vega, jarðtækni, lýsingar, skurðsniða, mislægra gatnamóta og undirganga. Verkís vinnur að þessum þáttum í samstarfi við ÞG Verktaka og aðra aðila verkefnisins, en Ramboll annast hönnun sjálfrar brúarinnar.

Umfangsmikil framkvæmd við Ölfusá

Nýja brúin verður 330 metra löng stagbrú með brúarturni á Efri-Laugardælaeyju. Brúin er hluti af stærra samgönguverkefni sem felur einnig í sér gerð nýs 3,7 km kafla Hringvegar og um eins kílómetra af öðrum vegum. Þá verða byggð ný vegamót og undirgöng fyrir meðal annars gangandi, hjólandi og hestamenn.

Núverandi Ölfusárbrú hefur þjónað vegfarendum í nærri 80 ár, en aukin umferð hefur skapað þörf fyrir nýja lausn. Með framkvæmdunum verða akstursstefnur aðskildar og Hringvegurinn færður út fyrir þéttbýlið á Selfossi. Markmiðið er að auka umferðaröryggi, draga úr umferðartöfum og bæta samgöngur á Suðurlandi.

Hönnun og innviðir í samhengi

Auk vegakerfisins tekur verkefnið til fjölbreyttra innviða og mannvirkja sem þurfa að vinna saman sem ein heild. Þar gegnir verkfræðihönnun mikilvægu hlutverki við að tryggja að vegir, jarðtæknileg útfærsla, brýr og undirgöng mæti kröfum um öryggi, virkni og endingu.

Framkvæmdir hófust árið 2024 og stefnt er að því að nýja brúin verði tekin í notkun haustið 2028.

Heimsmarkmið