Nýr útibússtjóri hjá Verkís

Um síðustu mánaðamót tók Ragnar Bjarnason við sem útibússtjóri Norðurlandsútibús Verkís á Akureyri. Ragnar tekur við af Jónasi V. Karlessyni sem hefur gegnt stöðunni í tæp 20 ár eða frá árinu 1999.

Norðurlandsútibú Verkís er elsta útibú Verkís, stofnað árið 1964. Fyrsti útibússtjórinn var Pétur Pálmason en árið 1984 tók Haraldur Sveinbjörnsson við. Jónas V. Karlesson tók við keflinu árið 1999 eins og áður sagði en nú hefur Ragnar Bjarnason tekið við.

Ragnar Bjarnason er byggingarverkfræðingur M.Sc. Hann hóf störf hjá Verkís árið 2014 og hefur að mestu unnið að hönnun burðarvirkja, eftirliti með verkframkvæmdum ásamt verkefnaumsjón.

Jónas mun áfram starfa í útibúinu við hlið Ragnars þannig að reynsla hans síðustu áratuga nýtist. Við þökkum Jónasi fyrir frábært starf sem útibússtjóri og óskum Ragnari farsældar á nýjum vettvangi.